မွန်ပြည်နယ်တရားလွှတ်တော်တရားသူကြီး ဒေါက်တာအောင်သီဟ မုဒုံမြို့မရဲတပ်ဖွဲ့အချုပ်စခန်းနှင့် ကမာဝက်ရဲတပ်ဖွဲ့အချုပ်စခန်း၊ သံဖြူဇရပ်မြို့မ ရဲတပ်ဖွဲ့အချုပ်စခန်းတို့အား ကြည့်ရှုစစ်ဆေး

မော်လမြိုင် ၊ စက်တင်ဘာ ၈

  မွန်ပြည်နယ်တရားလွှတ်တော်တရားသူကြီး ဒေါက်တာအောင်သီဟသည် မော်လမြိုင်ခရိုင်တရားရုံး တွဲဖက်ခရိုင်တရားသူကြီး ဒေါ်ခင်နီနီအေး၊ ဒေါ်ဥမ္မာမောင်၊ ပြည်နယ်တရားလွှတ်တော်မှ လက်ထောက်ညွှန်ကြားရေးမှူး ဦးဇာနည်မြင့်ဝေတို့နှင့်အတူ ယနေ့ နံနက်ပိုင်းက မုဒုံမြို့မရဲတပ်ဖွဲ့အချုပ်စခန်းနှင့် ကမာဝက်ရဲတပ်ဖွဲ့အချုပ်စခန်း၊ သံဖြူဇရပ်မြို့မ ရဲတပ်ဖွဲ့အချုပ်စခန်းတို့အား ကြည့်ရှုစစ်ဆေးခဲ့ရာ သက်ဆိုင်ရာ စခန်းတာဝန်ခံအရာရှိများက ရဲစခန်း ၊ အချုပ်ခန်းများ၏ အခြေအနေများကို ရှင်းလင်းတင်ပြခဲ့ကြပါသည်။

    ထို့နောက် ပြည်နယ်တရားလွှတ်တော်တရားသူကြီး နှင့် တာဝန်ရှိသူများသည် အချုပ်စခန်းအတွင်း အချုပ်သား/သူများ နေထိုင်သည့် အဆောင်များ ၊ နေထိုင်စားသောက်မှုနှင့် ကျန်းမာရေးစောင့်ရှောက်မှုတို့ကို လှည့်လည်ကြည့်ရှု၍ ၎င်းတို့၏ ဥပဒေပါ အခွင့်အရေးများ ရရှိခြင်း ရှိ/မရှိ ၊ နေရာထိုင်ခင်းအဆင်ပြေမှု ရှိ/မရှိ ၊ စားသောက်ရာတွင် အာဟာရသင့်တင့်မျှတမှု ရှိမရှိ နှင့်ကျန်းမာရေးစောင့်ရှောက်မှု ရ/မရ အခြေအနေများကို ကြည့်ရှုစစ်ဆေးမေးမြန်းပြီး လိုအပ်ချက်များကို ဖြည့်ဆည်းဆောင်ရွက်ပေးရန် စခန်းတာဝန်ရှိသူများကို မှာကြားခဲ့ပါသည်။