မွန်ပြည်နယ်တရားလွှတ်တော် တရားသူကြီးချုပ် မော်လမြိုင်အချုပ်ထောင်အား ကြည့်ရှုစစ်ဆေး

မော်လမြိုင်၊ စက်တင်ဘာ ၁၈

          မွန်ပြည်နယ်တရားလွှတ်တော်တရားသူကြီးချုပ် ‌ဒေါ်ဌေးမြင့်အေးသည် ပြည်နယ်တရားရေးဦးစီးမှူး ဦးထွန်းထွန်းအောင်၊ မော်လမြိုင်ခရိုင်တရားသူကြီး ဦးအောင်သိန်းဦးတို့နှင့်အတူ ယနေ့နံနက်ပိုင်းက မော်လမြိုင်အချုပ်ထောင်အား ကြည့်ရှုစစ်ဆေး ခဲ့ရာ အချုပ်ထောင်တာဝန်ခံအရာရှိက အချုပ်ထောင်အတွင်း အခြေအနေများကို ရှင်းလင်းတင်ပြပါသည်။

          ထို့နောက် ပြည်နယ်တရားလွှတ်တော်တရားသူကြီးချုပ်နှင့် အဖွဲ့ဝင်များသည် အချုပ်ထောင်အတွင်း အကျဉ်းသား/ အကျဉ်းသူများ၊ အချုပ်သား/အချုပ်သူများ နေထိုင်သည့် အဆောင်များ၊ စားဖိုဆောင်နှင့်ဆေးပေးခန်းတို့ကို လှည့်လည်ကြည့်ရှု၍ ၎င်းတို့၏ ဥပဒေပါအခွင့်အရေးများ ရရှိခြင်း ရှိ၊ မရှိ၊ နေရာထိုင်ခင်း အဆင်ပြေမှု ရှိ၊ မရှိ ကျန်းမာရေး စောင့်ရှောက်မှု ရ၊ မရ၊ အစားအသောက်များကျွေးမွေးရာတွင် အာဟာရသင့်တင့်မျှတမှု ရှိ၊ မရှိ အခြေအနေများကို ကြည့်ရှုမေးမြန်းခဲ့ပြီး လိုအပ်ချက်များကို ဖြည့်ဆည်းဆောင်ရွက်ပေးရန် အချုပ်ထောင်မှတာဝန်ရှိသူများကို မှာကြားခဲ့ကြောင်းသိရသည်။